പരസ്പര ബന്ധങ്ങൾ, ജീവിതശൈലി, ജീവിതത്തിലെ പ്രധാനപ്പെട്ട തീരുമാനങ്ങൾ തുടങ്ങി പല കാര്യങ്ങളേയും നേരിട്ട് സ്വാധീനിക്കുന്ന ഒന്നാണ് പണം എന്നത്. അതുകൊണ്ടു തന്നെ ആരോഗ്യപരമായ ബന്ധം നിലനിർത്തുവാനായി സാമ്പത്തിക കാര്യങ്ങൾ ജീവിത പങ്കാളിയുമായി ചർച്ച ചെയ്യേണ്ടത് അനിവാര്യമാണ്. ഒന്നായി ചേർന്നുകൊണ്ട് പണം മികച്ച രീതിയിൽ കൈകാര്യം ചെയ്യുവാൻ സാധിക്കുമ്പോൾ കുടുംബത്തിൻ്റെ ഐക്യം ബലപ്പെടുകയും കുടുംബത്തിലെ അന്തരീക്ഷം സന്തോഷകരമാവുകയും ചെയ്യുന്നു. ജീവിത പങ്കാളിയുമായി സാമ്പത്തിക കാര്യങ്ങൾ ചർച്ച ചെയ്യുന്നതിന്റെ പ്രാധാന്യത്തെക്കുറിച്ച് കൂടുതൽ മനസ്സിലാക്കുവാൻ ശ്രമിക്കാം.
സാമ്പത്തിക കാര്യങ്ങളിൽ ജീവിത പങ്കാളിയുടെ കാഴ്ച്ചപ്പാടുകൾ തിരിച്ചറിയുക
നിങ്ങളുടെ കുടുംബത്തിന് ശക്തമായ അടിത്തറ ഉണ്ടാക്കണമെങ്കിൽ ജീവിത പങ്കാളിയുടെ അഭിപ്രായങ്ങൾക്കും താല്പര്യങ്ങൾക്കും കാഴ്ചപ്പാടുകൾക്കും അർഹമായ പ്രാധാന്യം നൽകുവാൻ കഴിയണം. സമ്പാദ്യ ശീലം പണം ചെലവഴിക്കേണ്ട രീതി മുതലായ വിഷയങ്ങളെക്കുറിച്ച് പരസ്പരം ചർച്ച ചെയ്യുക.കൂടാതെ നിങ്ങളുടെ ദീർഘകാല അടിസ്ഥാനത്തിലുള്ള സാമ്പത്തിക ലക്ഷ്യങ്ങളെ കുറിച്ച് ചർച്ച ചെയ്യുക.
മേൽപ്പറഞ്ഞ കാര്യങ്ങളെല്ലാം തുറന്നു സംസാരിക്കുമ്പോൾ ഒരു വ്യക്തിയുടെ സാമ്പത്തിക കാര്യങ്ങളിലുള്ള കാഴ്ച്ചപ്പാട് മനസ്സിലാക്കുവാൻ നിങ്ങൾക്ക് അവസരം ലഭിക്കും. ചർച്ച ഗുണപരമായി മുന്നോട്ടുപോകുമ്പോൾ ലക്ഷ്യബോധത്തോടെ ഭാവിജീവിതത്തെ നിങ്ങൾക്ക് അഭിമുഖീകരിക്കാനാകും.
ജീവിത പങ്കാളികൾക്ക് അവരവരുടേതായ സാമ്പത്തിക സ്വാതന്ത്ര്യം ഉണ്ടെങ്കിൽ പോലും ചില വിഷയങ്ങളിൽ സാമ്പത്തികമായ ആശ്രയത്വം വെച്ചുപുലർത്തേണ്ടതായി വന്നേക്കാം. പരസ്പരം ചർച്ച ചെയ്ത് തീരുമാനിക്കുന്ന ജീവിത ലക്ഷ്യങ്ങൾ കരസ്ഥമാക്കുവാൻ സാമ്പത്തിക സഹകരണം അനിവാര്യമാണ്. സാമ്പത്തിക സ്വാതന്ത്ര്യം നിലനിൽക്കുമ്പോൾ തന്നെ പരസ്പരം ആശ്രയിച്ച് മുന്നോട്ടു പോകുന്നതിലൂടെ നിങ്ങളുടെ കുടുംബബന്ധം കൂടുതൽ ദൃഢമാകുന്നു.
ഓരോ വ്യക്തിക്കും അവരുടേതായ അഭിരുചികളും ലക്ഷ്യങ്ങളും ഉണ്ടായിരിക്കും. തൻ്റെ ജീവിതപങ്കാളിയുടെ വ്യക്തിത്വത്തെ ബഹുമാനിച്ചു കൊണ്ട് കൂട്ടായ ഉത്തരവാദിത്വത്തോടെ പ്രവർത്തിക്കുവാൻ തയ്യാറാവുക.
തുറന്നു സംസാരിക്കുക
നിങ്ങളുടെ സാമ്പത്തിക കാര്യങ്ങൾ തുറന്നു സംസാരിക്കുവാൻ തയ്യാറാവുക. നിങ്ങളുടെ ആകെ വരുമാനം, ചെലവുകൾ, കടങ്ങൾ എന്നിവയെക്കുറിച്ചെല്ലാം ചർച്ച ചെയ്യുക.
തുറന്നു സംസാരിച്ചാൽ മാത്രമേ പരസ്പര വിശ്വാസത്തോടെ കൂട്ടായ തീരുമാനങ്ങൾ എടുക്കുവാൻ കഴിയുകയുള്ളൂ. സുരക്ഷിതത്വമുള്ള ഒരു ഭാവിക്കായി ആത്മവിശ്വാസത്തോടെ ഒത്തുചേർന്ന് പ്രവർത്തിക്കേണ്ടത് അത്യാവശ്യമാണ്.
വ്യത്യസ്ത അഭിപ്രായങ്ങൾ പല കാര്യങ്ങളിലും കടന്നു വന്നേക്കാം. അങ്ങനെയുള്ള സാഹചര്യങ്ങളെ പോസിറ്റീവായി കണ്ടുകൊണ്ട് യുക്തിപരമായി ചിന്തിച്ച് അഭിപ്രായ സമന്വയത്തിൽ എത്തുക.
ഒരേ ലക്ഷ്യങ്ങൾക്കായി പ്രവർത്തിക്കുക
ജീവിത പങ്കാളികൾ ഭാവിജീവിതം ആസൂത്രണം ചെയ്യേണ്ടത് അവർക്കനുയോജ്യമായ സാമ്പത്തിക ലക്ഷ്യങ്ങൾ കണ്ടെത്തുന്നതിലൂടെയാണ്. ഒരു വീട് സ്വന്തമാക്കുക, കുട്ടികളുടെ വിദ്യാഭ്യാസം, ഒരു വാഹനം സ്വന്തമാക്കുക, റിട്ടയർമെൻ്റ് ജീവിതം തുടങ്ങി പരസ്പരം ചർച്ച ചെയ്തു ജീവിതലക്ഷ്യങ്ങൾ തിരഞ്ഞെടുക്കുക.
ജീവിതലക്ഷ്യങ്ങൾ തിരഞ്ഞെടുത്തതിന് ശേഷം ലക്ഷ്യങ്ങളിലേക്ക് എത്തിച്ചേരുവാൻ പ്രായോഗികമായ പദ്ധതികൾ ആവിഷ്കരിക്കുക. ലക്ഷ്യങ്ങൾ കൈവരിക്കുവാനുള്ള യാത്രയിൽ പരസ്പരം പ്രചോദനം നൽകുകയും ശക്തി പകരുകയും ചെയ്യുക. വ്യക്തമായ ലക്ഷ്യബോധത്തോടെ ഒത്തൊരുമിച്ച് മുന്നേറുവാൻ ശ്രമിക്കുക.
ബഡ്ജറ്റ് തയ്യാറാക്കുക
ശോഭനമായ ഒരു ഭാവിയ്ക്ക് വേണ്ടി ബഡ്ജറ്റ് തയ്യാറാക്കുക എന്നത് വളരെ പ്രധാനപ്പെട്ട കാര്യമാണ്. രണ്ടു പേരുടേയും അഭിലാഷങ്ങൾക്ക് ഒരുപോലെ പ്രാധാന്യം നൽകിക്കൊണ്ട് കുടുംബത്തിൻ്റെ ആകെ വരുമാനവും ചെലവും മുൻനിർത്തി ബഡ്ജറ്റ് തയ്യാറാക്കുക.
ജീവിത പങ്കാളിയുമായി ചർച്ച ചെയ്ത് രണ്ടു വ്യക്തികൾക്കും ഒരുപോലെ ഉത്തരവാദിത്വമുള്ള രീതിയിൽ ആയിരിക്കണം ബഡ്ജറ്റ് തയ്യാറാക്കേണ്ടത്. പണം ചെലവഴിക്കുന്ന രീതി കൃത്യമായി മനസ്സിലാക്കുവാനും ആവശ്യമുള്ള മാറ്റങ്ങൾ വരുത്തുവാനും രണ്ടു പേരും പരസ്പരം സഹകരിക്കുക.
എമർജൻസി പ്ലാനിങ്
ജീവിതത്തിൽ ഏതൊരു അവസരത്തിലും ഒഴിവാക്കാനാകാത്ത ചില പ്രശ്നങ്ങൾ കടന്നു വരുവാൻ ഇടയുണ്ട്. തൊഴിൽ നഷ്ടം, ആരോഗ്യ പ്രശ്നങ്ങൾ തുടങ്ങി പലവിധത്തിലുള്ള ജീവിത സാഹചര്യങ്ങൾ നാം നേരിടേണ്ടി വന്നേക്കാം.
ഇങ്ങനെയുള്ള അപ്രതീക്ഷിത ചെലവുകൾ നേരിടുവാനായി ഒരു സുരക്ഷിത വലയമായി പ്രവർത്തിക്കുവാനാകുന്ന എമർജൻസി ഫണ്ട് സൃഷ്ടിക്കുന്നതിന് പ്രാധാന്യം നൽകുക. മൂന്നു മുതൽ ആറു മാസം വരെയുള്ള ജീവിത ചെലവുകൾക്ക് ആവശ്യമായി വരുന്ന തുകയാണ് എമർജൻസി ഫണ്ടിൽ ഉണ്ടായിരിക്കേണ്ടത്. ചില അത്യാവശ്യ ഘട്ടങ്ങളിൽ പിരിമുറുക്കം ഒഴിവാക്കാനും സാമ്പത്തിക സ്ഥിരത നിലനിർത്തുവാനും എമർജൻസി ഫണ്ടിലെ തുക സഹായകരമാകും.
ഭാവി ജീവിതത്തിനായി നിക്ഷേപം നടത്തുക
വ്യത്യസ്ത നിക്ഷേപ സാധ്യതകളെക്കുറിച്ച് ചർച്ച ചെയ്യുക. റിയൽ എസ്റ്റേറ്റ്, ഓഹരികൾ, മ്യൂച്വൽ ഫണ്ടുകൾ, മറ്റ് റിട്ടയർമെന്റ് പദ്ധതികൾ തുടങ്ങിയവയിൽ ഏതാണ് നിങ്ങൾക്ക് ഏറ്റവും യോജിച്ചതെന്ന് കണ്ടെത്തുക. നിക്ഷേപിക്കുന്നതിന് മുൻപ് നിങ്ങൾ തിരഞ്ഞെടുക്കുന്ന നിക്ഷേപ മാർഗവുമായി ബന്ധപ്പെട്ട ലാഭസാധ്യതയും റിസ്കും കൃത്യമായി മനസ്സിലാക്കുക.
നിങ്ങളുടെ സാമ്പത്തിക ഭാവി സുരക്ഷിതമായിരിക്കണമെങ്കിൽ മികച്ച നിക്ഷേപ സാധ്യതകൾ കണ്ടെത്തേണ്ടത് അനിവാര്യമാണ്. അതുകൊണ്ട് വളരെ ശ്രദ്ധയോടെ വേണം നിക്ഷേപവുമായി ബന്ധപ്പെട്ട തീരുമാനങ്ങൾ എടുക്കേണ്ടത്.
സാമ്പത്തിക സ്ഥിതി തുടർച്ചയായി വിലയിരുത്തുക
നിങ്ങളുടെ സാമ്പത്തിക സ്ഥിതി മനസ്സിലാക്കി പ്രവർത്തിക്കുക. ലക്ഷ്യങ്ങളുടെ പുരോഗതി വിലയിരുത്തുവാനും ആവശ്യമെങ്കിൽ നിങ്ങളുടെ ലക്ഷ്യങ്ങളിൽ അനിവാര്യമായ മാറ്റങ്ങൾ കൊണ്ടുവരുവാനും തയ്യാറാവുക. നിങ്ങളുടെ സാമ്പത്തിക സാഹചര്യങ്ങൾക്ക് അനുസൃതമായി നിങ്ങളുടെ പദ്ധതികളിൽ മാറ്റങ്ങൾ കൊണ്ടുവരിക.
ഒരു വ്യക്തിയുടെ സാമ്പത്തിക സാഹചര്യങ്ങളിൽ പല കാരണങ്ങൾ കൊണ്ട് മാറ്റങ്ങൾ സംഭവിക്കുവാൻ ഇടയുണ്ട്. ആ മാറ്റങ്ങളോട് പൊരുത്തപ്പെട്ട് ലക്ഷ്യങ്ങൾ മുൻനിർത്തി പ്രവർത്തിക്കുവാൻ നിങ്ങൾക്ക് സാധിക്കണം. വിപണിയിലെ മാറ്റങ്ങളും നിങ്ങളുടെ നിക്ഷേപങ്ങളുടെ പ്രകടനങ്ങളും തുടർച്ചയായി വിലയിരുത്തണം.
സംഗ്രഹം
ക്ഷമയും പരസ്പര ധാരണയും ഉണ്ടെങ്കിൽ മാത്രമേ ജീവിതപങ്കാളിയുമായി ചർച്ച ചെയ്ത് സാമ്പത്തിക തീരുമാനങ്ങളിൽ എത്തിച്ചേരുവാൻ സാധിക്കുകയുള്ളൂ. നിങ്ങളുടെ ജീവിതപങ്കാളിയുമായി ഒത്തുചേർന്ന് പ്രവർത്തിക്കുവാൻ മേൽപ്പറഞ്ഞിരിക്കുന്ന കാര്യങ്ങൾ കൃത്യമായി പിന്തുടരുക. ഒന്നായി ചേർന്ന് സമാധാനവും സന്തോഷവും സുരക്ഷിതത്വവുമുള്ള ഭാവി ജീവിതം കെട്ടിപ്പടുക്കുക. നിങ്ങളുടെ ലക്ഷ്യങ്ങളും ചിന്തകളും പരസ്പരം പങ്കുവെച്ച് ഒന്നായി പ്രവർത്തിച്ച് മികച്ച രീതിയിൽ പണം കൈകാര്യം ചെയ്യുക.
